Árvvoštallan Stöld

Čálli: Ann- Helén Laestadius (Romanus Selling, 2021)

Buori girjji vuohttá das go lohkan lea geahpas ja teaksta bisána millii. Mus goit lei nu go lohken girjji ja guldalin jietnagirjji Stöld. Girji álgá boazosuolademiin ja váldoolmmoš, ovccijahkásaš Elsa, šaddá oaidnit ahte su miessi goddo ja suola vel čuohppá beljiid eret vai mearkka ii sáhte njávkat. Suola áitá nieiddaža jaskatvuhtii. Ja nu de lohkki rohttejuvvo Elsa muitalussii, nieiddažin ja nuorra nissonin boazodoalus.

Laestadius lea čeahpes muitaleaddji ja son nana ja dárkilis gielain ealáskahttá teavstta dego filbman. Laestadius čilge buoret go goassege árat sámi servodaga ja lea deaivil ja kritihkalaš go govahallá ovdamearkka dihte sohkabeali minstariid ealáhusas dahje mo struktuvrralaš nállevealaheapmi doaibmá ja doalahuvvo heakkas Ruoŧas ain odne.

Munnje sápmelaš lohkkin leatge dát digaštalli oasit girjjis mat govahallet ja vihkkedallet Sámi mávssolaččat. Mun jáhkán girji boahtá doaibmat nu, ahte olggobealde Sámi olbmuide lea girji gelddolaš dego rihkusmuitalus danne go sii ohppet ja fuomášit mo Sápmi dál doaibmá. Sámi lohkkit fas sáhttet girjji bokte guorahallagoahtit beliid min servodagas mat leat váddásat, lossadat ja hearkkit. Ja lihkus girjjis lea dát duppalkommunikašuvdna, ahte buohkaide doaibmá ja ahte girji ii leat áddemeahttun, lossat dahje oktageardán lohkkái.

Rasisma njulgestaga goddá ovttaskas olbmo sielu ja eallinmovtta. Ja áiddo nu subtiila go rasisma lea, ja juste mo váldoservodat ja báikegottážat normaliserejit nállevealaheami ja badjelgeahččama, dan máhttá Laestadius govahallat. De fertejit dušše váldoservodaga lohkkit suorganit dasa maid girjji váldokarakteara jo diehtá rasismas, nu go mii earátge sámit.

Teavsttas leat, nu go Elin Anna Labba girjjis ge, sámegiel sánit. Kapihtallogut leat sámegillii. Kánske čálli lea lagat giela maid? Ann-Helén Laestadius lea mávssolaš čálli ja dán berrešii Ruoŧa girjjálašvuođabálkkášumi nammadanlávdegoddi nai fuobmát dál.

Ánne Wuolab

Ovttasbargu Nuorat bláđiin